|  |
|  |
|  | | | |  |
Schluckimpfung uff pälzisch
vum Thomas Ostmann unnem Helmut Marnet
In de Zeidung is zu lese,
es is heit g’fährlich, zu verräse.
Heimlich unn in aller Stille
fangscht der oftmols die Bazille.
Unn manchen Mexiko-Tourischt
hots nadierlich glei verwischt.
Kummt hääm, ganz braun, steigt aus dem Flieger,
do streck nen die Bazille nieder.
Blass, malad, uff alle Viere
duht er soin Dokter konsuldiere.
Der unnersucht’en nooch dem Trip,
„Glickwunsch, Sie hän Schwoinegripp…“
Kaum duht de Dokter des erwähne,
steckt er’n in die Quarantäne.
Den arme Deiwel hot’s getroffe,
de Worschtmarkt is fer den geloffe…
Um uns Pälzer zu verschone,
greifen mer zu Präventione.
Mer hot, weil des jo arg pressiert,
ä Schluckimpfung organisiert.
Middem Serum aussem Fass
macht des Impfe rischdisch Schbass.
Ziehscht der vun dem Zeig was noi,
sparscht Dokter, Spritz unn Krankeschoi.
Die Drobbe schmecken a noch lecker,
die gibt’s fer alle Sorte G’schmäcker…
Muscht net zum Apotheker laafe,
Doin Impfstoff kannscht beim Winzer kaafe…
Dank Palzwoi werrscht Du Herr der Lage,
de Gretz, der geht’s jetzt an der Krage.
Als Erschtes hängscht Doi Pälzer Nas
mol in e volles Dubbeglas.
Impfscht dann oral mit Riesling drugge,
duhn die Bazille zamme zugge.
Bevor mer hääm geht noch enn Sekt,
dann sinn die Vire ganz verreckt…
In de Schubkärch werd gezäppelt
unn mit Schobbe uffgepäppelt.
Do werd geimpft, unn des in Masse,
de Zapphahn uff – unn hoch die Tasse…!!!
Die Bevölkrung werd gebete,
uffem Worschtmarkt ozutrete.
Statt nooch Mexiko zu brumme,
missner all nooch Därgem kumme.
Unn die Moral is vun dem Ganze:
Schütter Palzwoi in de Ranze…
Am aller beschte gscheit dosiert,
damit ah wirklich nix bassiert…!!!
© Thomas Ostmann und Helmut Marnet 2009
www.einfach-so.net
 |
| |  | |  | |  |
| |
