Enn göttliche Dialekt
(oder: Die Pälzer Grundsatzerklärung)

vun Helmut Marnet 

Fünf Pälzer betreiben zu speeter Stunde
Dialekt– unn Heimatkunde.
Sie stellen fescht, an viele Orte,
spricht mer bissel annerscht –
unn hot manchmol annere Worte.

Bis dief in die Nacht duhn se philosophiere,
oder uff gut Pälzisch – sie duhn „dischbediere…“

Ääner vun Franggedahl, der meld sich:
„Am schäänschte ist doch Vorderpälzisch.
Im Strandbad mach mer‘s allerbescht
ä ganzi Nacht lang Mundartfescht.“

De Zwädde, aus de Neh vun Speyer,
määnt: „Ach Gott, was ä Geleier.
Durchs Altpörtel in unserer Mitte
sinn schun Kaiser unn Päpschte durchgeritte.“

De Dritte dann, vun Landau drunne,
hot soi Sprooch am schänschte g’funne.
„Erscht in unserm Dialekt
klingt Pälzisch ganz unn gar perfekt…“

De Vierte, aus de Palz ehrm Norde,
macht do gar net viele Worte.
„En Blick uff de Dunnerschberg zeigt doch gewiss,
dass die Palz bei uns am heegschte is…“

De Fünfte, aus de Neh vun Lautre,
duhts bei dem Ganze blos noch schaudre.
„Meer klären des am Beschte ganz
durch die aller heegscht Instanz.

Meer froogen drowwe unsern Gott,
der des jo alles erschaffe hot.“
Sie gehen zum Chef unn der sagt sonor:
„Alla hopp, ehr Buwe, dann tragen mol vor…“

Er heert alles oh – unn setzt dann soi göttliches Wort
mit ääner „Grundsatzerklärung“ fort.

„Ich hab die Dialekte verdäält
unn mich doch glatt um ääner verzehlt.
Fer die Pälzer war känner mehr do,
Naja, so ä Pech – dann isses halt so…“

Doch des losst ihm gar kä Ruh
unn er kriet nachts kä Aag mehr zu.
Denn unsern Herrgott, des känner Eich denke,
der losst niemols jemand hängge.

Er versammelt doher die Pälzer um sich:
„Dann babbeln ehr halt so wie ich…
Unn außerdem krien ehr als Clou
des Paradies grad mit dezu…

Aaawer….
gell, dro denke… es wär net verkehrt,
wann mer ab unn zu mol… soin Herrgott ehrt.“

Egal was is, egal was kummt,
unsern Herrgott, der nimmt kä Blatt vor de Mund.

„Ehr sinn jetzt extra vun do drunne
wege ääner Froog gekumme.
Schun die ganz Zeit waren Ehr jetzt geduldiscch,
ich bin Eich noch die Antwort schuldisch.

Ja, de Pälzer Dialekt
steht fer Werte wie Respekt.
Durch alle Diefe unn alle Heehe
soll ’ner immer uffrecht durchs Leewe gehe.

Die Pälzer war’n in Hambachs Gaade
die erschte deitsche Demokrate.
Dann sinn se mit ähm riese Tross,
losgezoge, hoch zum Schloss…

Um die Erkenntnis zu erwähne:
Des klappt jo wunderbar – im Klääne.
Des hab ich in de Palz prowiert
unn des hot’s beschtens funktioniert.

Doch geht mer in die groß weit Welt,
dann zehlen bloß noch Macht unn Geld.
So manches is, des sag ich Eich offe,
bissel aus ‘em Plan geloffe…

Ehr Pälzer krien uff Grund der Lage,
vun meer noch ebbes uffgetrage.

Vun Hass unn Hetz unn all dem Dreck,
lossen bloß die Finger weg.
Waffe, Bombe unn Kanone –
die känner verschrodde, viel besser geht’s ohne.

Unn will Eich ääner was anneres sage –
dann duhnen glei zum Deiwel jage !

Noch ebbes sag ich Eich ganz direkt:
känn Mensch is oder war jemols perfekt.
Wann ääner mol fallt, dann helfen ihm uff –
unn treten net noch uffen druff.

Ehr all sinn schun mol los gezoge
unn unnerwegs falsch abgeboge.
De Weg zurick is ganz ohne Frage,
immer vun Liebe unn Hoffnung getrage.“

Die Pälzer ziehen dann jedenfalls
widder häämwärts in die Palz.

„Vergessen net, vor alle vor alle Dinge,
de Pälzer moi göttlichi Botschaft zu bringe.
Grieß mer die Pälzer uff alle Fäll
unn kummen widder – awwer bloß net so schnell…

Moin Sege werd fer alle Zeite
die Pälzer unn die Palz begleite.
Egal was kummt, ich leg moi Hand
immer schützend uff’s Pälzer Land…!!!

Friede sei mit Eich !!!
Amen.“

PS: Ich erheb moi Glas uff unser gudi, aldi Palz unn uff die Pälzer sowie uff alle, die uns wohl gesunne sinn.
Möge die Pälzer Fahn fer alle Zeite in Friede unn in Freiheit wehe !!!

© Helmut Marnet 2022
www.einfach-so.net